登地聯捱到殘讓波濕滯

猪拉多纳

亞洲電視不獲續牌，不過呢間自稱「香港良心」嘅電視台仲繼續播免費波畀大家，今日深夜就有蘇超同市打吡戰，登地主場硬撼登地聯，登地聯早排連鬥些路迪四鑊後元氣大傷，受讓嘅登地值得捧場，雖然讓球主勝得1.47倍略嫌過熱，但搵嚟做膽就最穩陣！

（亞視國際台周四凌晨2時45分直播）

登地聯狀態認真濕滯，連續9場不勝，當中4戰些路迪輸足3場都不特止，更大鑊係踢到班球員傷晒兼冇士氣，除咗前鋒馬里奧比拿迪同後衞約翰蘇達亞因傷缺陣外，仲有守將賴恩麥高雲坐波監，殘陣下作客點贏到登地呀？再加上登地聯主帥麥拿馬拉不滿佢同球會之間嘅合約內容公諸於世，睇嚟今場好難專心領軍擊敗死敵。
辛尼特恃質恰泰歷克

另外阿King睇中咗場俄超泰歷克主場對辛尼特，泰歷克近期輸多贏少，辛尼特實力又高過佢哋好多，客勝捧得過。

（now 671周三晚10時45分直播）

最後意甲帕爾馬對烏甸尼斯，雖然帕爾馬同亞視同一命運，不過呢隊波都仲未頹到任人魚肉，烏甸尼斯有中場比斯及後衞艾雲皮里斯累積夠黃牌要停賽，今場頂多小勝，建議捧細盤。

（TVB 301周四凌晨零時30分直播）