利物浦 布力般爭食大茶飯

猪拉多纳

事隔4個禮拜，布力般流浪同利物浦今晚喺英總易地再戰，進行8強重賽。「紅軍」近期表現插水，今仗仲要有謝拉特、史卡迪爾同安利簡恩3位中後場猛將坐波監，對住有由當Fit射手佐敦洛迪斯孭飛嘅布力般做硬大騷，捧1.78倍大啱數。

（now621、633及668台周四凌晨2:45直播）
紅軍焗用豆腐防線

利物浦最近連環輸畀曼聯同阿仙奴，上仗1:4大敗畀「兵工廠」之後，唔單止爆出將帥不和消息，領隊羅渣士仲當眾指摘中堅高路托尼表現曳，陣營七國咁亂。奈何史卡迪爾同安利簡恩今仗會聯同「謝四」停賽，即係話就算羅渣士幾唔妥高路托尼，今晚都要焗住派佢同洛夫雲鎮守防線，聽見都Feel到危危乎。

爭入英超前4機會渺茫，最有機會繼2012年聯賽盃後再嘗奪冠機會嘅就係足總盃，相信就算「紅軍」個陣再殘，今鋪作客都肯定焗攻，力爭晉級同阿士東維拉喺4強鍊過，預計唔慌踢得保守。

首戰喺晏菲路同利物浦踢成0:0嘅布力般，晉級過程已經搞死過史雲斯同史篤城，堪稱「巨人殺手」。佢哋家陣傷兵問題唔少，計落有基斯泰迪、祖舒亞京治同西蒙伊斯活特等十字軍，但陣中首席射手佐敦洛迪斯近期着晒火，今季已經有17個聯賽「士哥」，洛迪斯入得，利物浦又肯定踢得進取，入波邊會少吖！