戴拿模平內亂誓炒私房菜

猪拉多纳

周日俄超尾場上演強弱懸殊之戰，莫斯科戴拿模主場迎戰摩度維亞，前列分子戴拿模經過一段低潮後已解決內部問題重返正軌，主場出擊有力炒起「升降機」兼「私房菜」摩度維亞，推介讓球主勝。

（周日晚11時30分開賽）

上季聯賽殿軍戴拿模今季原本維持強勢，俄超穩居前列之餘，歐霸盃亦殺入十六強，不過較早前出現嚴重將帥不和，中場主力丹尼索夫同教練查治索夫鬧翻，加上兩線作戰吃力，上月中起喺聯賽同歐霸一度五輪不勝，最終無緣歐霸八強。不過會方決定支持教練撥亂反正，上輪莫斯科打吡大戰將丹尼索夫雪藏並決定將佢掛牌出售，結果球隊重新振作，作客以2比1勇挫宿敵中央陸軍，兩名進攻中場伊奧洛夫同迪素迪沙基表現出色，配合前德國國腳箭頭古蘭爾嘅攻擊組合威力十足。戴拿模今仗重返主場作戰，又可以夫添出擊，佢哋一向係「弱隊殺手」，加上歷來五次對摩度維亞保持全勝，當中有四場仲係作客，前季唯一一次主場就贏3比1，今晚當然有信心再炒對手。
摩度維亞近仗水準極低

摩度維亞近年一直扮演「升降機」角色，每降俄甲即升，每升俄超即降，今季重返俄超，季前備戰工作做得十分積極，所以季初表現超乎理想，令佢哋能夠位列中游，不過球員質素始終低，踢咗半季已經力歇，自去年十二月起喺俄超同俄盃兩線作戰，連續七仗不勝兼錄得零入球，直至上輪聯賽主場面對阿馬卡，至憑開波三分鐘一個12碼入波，最終小勝1比0重返勝軌兼打破入球荒，賽後全隊好似捧咗盃咁開心。不過要留意阿馬卡只係包緊尾嘅降班鐵膽，摩度維亞喺主場人多打人少下居然都大部分時間處於下風，證明狀態好極有限，今晚作客面對戴拿模注定做炮灰。