波圖主場惡氣十足 遇強頂住唔使輸

猪拉多纳

歐聯8強戰首回合今晚會續演兩場，其中葡超波圖會喺主場鬥「德甲巨人」拜仁慕尼黑。波圖主場表現一向有保證，今仗就算面對拜仁都冇有怕。至於拜仁作客亦未必會同波圖「硬碰硬」，始終兩回合制要戰鬥180分鐘甚至更耐，而今仗只係首回合，仲有次回合90分鐘要踢，因此度士覺得今仗好大機會和氣收場，一於捧和波。

波圖主場火龍球場嘅戰績一向好惡，球隊今季喺主場只係輸過畀賓菲加同士砵亭兩支國內死敵，反而歐聯嘅戰績仲好，近5仗主場賽事攞到4勝1和。波圖最近10場主場賽事錄得全勝，今仗雖有後衞馬簡奴停賽，但面對傷兵滿營嘅拜仁相信可以保住不失，今仗和波有3.35倍值得支持。

至於西甲勁旅巴塞隆拿，將會同剛贏得法聯盃冠軍嘅巴黎聖日耳門（PSG）重演分組賽戲碼。PSG今仗陣容雖天殘地缺，前鋒伊巴謙莫域、中場馬高華拉堤及後衞奧里亞停賽，而中堅大衞雷斯則因傷唔踢得，個陣殘到冇朋友。
PSG受讓着數

不過，巴塞近況亦唔算好，上場聯賽竟喺領先兩球下被西維爾逼和，今仗仲要有右閘丹尼爾停賽，再加上兩軍上次喺分組賽交手，PSG喺主場都能夠贏到巴塞，度士睇好佢哋有能力再重演歷史，受讓半一梗係捧下盤啦！
度士醒你：前香港足球先生，畀料同佢做人一樣，百足咁多爪，對唔同聯賽都有興趣。教波同貼波，一樣做阿哥。