拜仁客戰波圖好細界

猪拉多纳

呢邊冇雙翼 嗰邊少雙箭

歐聯半準決賽首回合葡超「二哥」波圖主場對德甲班霸拜仁慕尼黑，拜仁係晉級大熱門，不過球隊目前仲有超過半隊主力養傷，一雙魔翼洛賓同列貝利繼續缺陣，以教練哥迪奧拿性格會繼續歎慢板，旨意神龍紐亞頂住，然後等次回合返主場至開殺戒，遇啱波圖兩大首席射手都養傷多時預期難趕及復出，今場推介1.7倍細盤。

（有線62及202台周四凌晨2時45分直播）
旨意神龍紐亞頂住

拜仁傷兵滿營，上周末聯賽對法蘭克福只得十五個球員可以用，今場主力包括洛賓、列貝利、舒韋恩史迪加、阿拉巴、貝拿迪亞同查維馬天尼斯都無緣復出，但中堅謝路美保定同後備前鋒比沙路傷愈趕及出征。洛賓同列貝利一直係拜仁進攻泉源，兩人今季只曾四次同時缺陣，拜仁只贏過上周末一場，原因係對手法蘭克福根本不設防，之前三場聯賽對史浩克，漢堡同慕遜加柏只攞到兩分，三場加埋只入一球，足證冇咗佢兩個影響有幾大。

拜仁上圈喺歐聯十六強面對薩克達，首回合作客擺明佔盡上風都唔急，悶和0比0了事，今仗對手更強而本身陣容更殘，相信哥迪奧拿會照辦煮碗，仲打算擺４３２１陣式求穩，球隊本月作客全無霸氣，聯賽主守下小勝多蒙特一球，德國盃對利華古遜亦百二分鐘交白卷要互射12碼。不過拜仁有神龍紐亞把關真係高枕無憂，佢今季上陣二十六場聯賽有十七仗保持不失，八場歐聯亦有六場保持清白之身。
丹尼路雷斯準備上艦

波圖近況一般，月初喺葡聯賽遭弱旅馬里迪莫淘汰，陣中兩大主力射手積臣馬天尼斯同基斯甸泰路都養傷多時，今仗復出機會甚微，更難攻破紐亞十指關。不過佢哋主場防守一向穩陣，今季十四場聯賽只失三球係葡超最佳，右閘丹尼路雷斯踢到識飛，會方已經宣布佢今夏將以逾三千萬歐元轉會費加盟皇馬，今仗喺拜仁一雙魔翼缺陣下，要突破佢將會更艱難。