里昂雙星彈起有鑊氣

猪拉多纳

趁住法甲榜首巴黎聖日耳門（PSG）今周要分心歐聯，「阿二」里昂今場喺主場迎戰巴斯蒂亞係坐正嘅大好時機，今季異軍突起嘅里昂彈出多位新星，包括前鋒拿卡錫迪同中場費基亞已經畀一眾豪門吼到實。今場體力充沛嘅里昂對住身心俱疲嘅巴斯蒂亞，有望大開殺戒，阿King強烈推介讓球主勝！

（TVB 302周四凌晨零時30分直播）

巴斯蒂亞剛喺法聯盃決賽淨吞PSG四隻光蛋，未能奪得三十幾年來首個大賽冠軍，後衞史基拿斯仲要喺上半場初段被逐，球隊大部分時間都十人應戰，失咗個獎盃仲要踢到殘晒，巴斯蒂亞今場作客注定要輸波。相反里昂有超過十日時間休息，四月初客戰完甘岡後就再冇波踢。呢隊波沉寂多時，對上一次奪取法甲冠軍已經要數到07-08球季，今季難得捲土重來，同星光熠熠嘅PSG鬥到呢個階段，已經再冇失分空間。好彩兩大主力拿卡錫迪同費基亞狀態繼續托弗，前者喺聯賽已經入咗二十五球，年僅二十一歲嘅費基亞亦有十二球進帳，搞到曼城、阿仙奴同利物浦等英超勁旅對佢兩個流晒口水。里昂今場仲有隊長干拿倫斯傷愈復出，巴斯蒂亞都係聽炒喇！
屈福特搶分「大」駁火

阿King講埋兩場英冠賽事，先有力爭直接升班資格嘅屈福特作客諾定咸森林，屈福特今場戰意唔使懷疑，而且雙方近四次碰頭三次開大，今場大盤值捧。另外就係富咸主場對洛達咸嘅護級之戰，洛達咸作客例牌腳軟，近七作客輸足六場，而且防守好曳，一於再捧入球大！