拜仁傷兵多 讓波實死火

猪拉多纳

歐聯8強 大熱登場

今晚歐聯8強首回合繼續開戰，德甲班霸拜仁慕尼黑將會造訪葡超勁旅波圖。波圖喺今屆分組賽對手實力麻麻，就算去到16強亦只係遇過巴素利，入到8強同抽靚籤有好大關係，不過大家咪睇小波圖嘅機動性踢法，今晚趁「宇宙拜仁」傷兵滿營，有望藉主場10連勝嘅威勢偷雞，一於博2倍嘅「讓球主勝」！

（有線62、202周四凌晨2:45直播）
波圖今季主場9成不敗

主場已經10連勝嘅波圖，喺今屆歐聯主場5戰錄得4勝1和，就算對手唔算太強，佢哋喺葡超踢14場主場亦有12場勝仗，總計今季只係輸過2場，主場不敗率達91%，威力毋庸置疑。波圖雖然有當紮射手積臣馬天尼斯已克服傷患，弊在今場未必出得，前線要靠晒葡萄牙老牌國腳哥利斯馬，同埋西班牙新星奧利華托利斯攻堅，威脅拜仁嘅大門啦！
拜仁洛賓列貝利養傷

拜仁喺歇冬後氣勢稍為轉弱，近4仗錄得2勝1和1負，4仗只攻入4球火力疲弱，最大問題係佢哋依家傷兵甚多，列貝利、舒韋恩史迪加兩大主將今場因傷肯定唔踢得，加埋已經養緊傷嘅洛賓、阿拉巴、貝拿迪亞同查維馬天尼斯，戰鬥力的確削弱唔少。

經驗豐富嘅教練哥迪奧拿都知道喺有限人腳下，唔可能輕視任何對手，睇番上一圈對住薩克達，拜仁同樣喺首回合作客踢穩陣波，結果只係打和0:0，等次回合返到主場先開行Turbo大炒7:0晉級，今晚拜仁隨時重施故技以穩為先，作客要讓波，寧願捧波圖「讓主」好過。
盤路解碼：波圖連續9場歐洲賽主場未輸過。

Data King：拜仁8戰歐聯僅兩場失波

‧波圖連續9場歐洲賽主場不敗。

‧拜仁於今屆歐聯一共有10位球員入過波。

‧拜仁今屆8場歐聯6次保住清白身。