小保加出硬線歎細界

猪拉多纳

聽朝有幾場南美自由盃上演，阿King睇中咗阿甲小保加主場對智甲柏利斯天奴。小保加目前喺第五組排榜首已篤定出線，今仗未必會出主力應戰。柏利斯天奴實力始終同小保加有一段距離，加上分組賽主場都輸過畀小保加，今仗作客更加冇甜頭，捧細盤。

（周五早上6時45分開賽）

小保加喺自由盃第五組五戰全勝高踞榜首，肯定以首名晉級十六強。小保加開季至今喺所有賽事都未輸過，完全表現出阿甲班霸本色，尤其係呢班波其實有唔少長期傷兵，包括前鋒施巴斯坦柏拿斯奧斯、中場加高、古巴斯及後衞阿歷西斯洛連等仍未好番，有呢個表現真係好難得。小保加中場艾比斯今仗有傷上陣成疑，但喺本土聯賽停賽嘅門將奧利安上陣，就算以一眾副選球員出戰，相信仍可擊敗柏利斯天奴，但要大勝似乎會有啲難度。
柏利斯天奴入波都唔易

柏利斯天奴現時與烏拉圭球隊蒙特維多流浪同分，由於佢哋得失球差較蒙特維多流浪優勝，今仗只要贏波就可晉級。柏利斯天奴近期連贏四場狀態唔錯，雖然前鋒連拿度拉莫斯因傷唔踢得，但另一射手迪亞高查維斯上仗休息，如無意外會重返正選陣容。

不過，柏利斯天奴嘅實力始終同小保加有一段距離，上次主場出擊都要輸波，今仗作客要入波相信更唔容易。值得一提，小保加分組賽所面對嘅對手，如果首場係開大盤，次仗無論主場作客都會繼續開大盤，柏利斯天奴上仗主場輸0比2，所以今仗大有可能開出細盤。