布魯日地頭蟲殺迪

猪拉多纳

今屆表現令人眼前一亮嘅比利時球隊布魯日，今晚喺歐霸8強首回合坐鎮主場，迎戰烏克蘭三哥迪尼普。布魯日唔單止喺今屆賽事未嘗一敗，在名宿普荷美帶領下亦係正宗地頭蟲，愈戰愈勇，絕對唔赦迪尼普來襲，小讓平半兼低水有買趁早。

（有線63台周五凌晨3時05分直播）

比利時球隊多年來喺歐洲賽冇晒影，但今屆布魯日喺歐霸異軍突起，連埋外圍賽在內取得11勝3和未輸過，係今屆歐霸唯一未敗之師，若果單計主場，佢哋更7場贏咗5仗，弗到漏油。查實布魯日上月先捧走比利時足總盃，依家喺國內聯賽踢緊附加賽爭總冠軍，連埋歐霸戰線真係忙到甩轆，好彩其主帥、前比利時鋼門普荷美深明留放之道。
迪尼普沙高夫停賽影響大

好似布魯日日前聯賽附加賽對哥治，未夠廿分鐘就落後兩粒，布軍亦刻意拖慢節奏，擺明冇心追和，一來附加賽只係踢咗兩輪，佢哋仍以兩分騎住亨克及安德列治位居榜首，二來好明顯係為歐霸留力喇，而且布魯日近10場喺主場出擊，豪取9勝1和佳績，真係邊隊造訪都好難全身而退，隨住暫以8球排射手榜一哥嘅阿倫杜格拉斯已改投中超班霸廣州恒大淘寶，另一入8粒嘅盧卡古亦隨愛華頓出局，有6球在手嘅布魯日前鋒拉法洛夫成為爭金靴嘅熱門之一，撞正迪尼普悍將沙高夫要坐波監，令中場掃蕩力大減，梗係想趁機入波甩開同樣入6球嘅拿玻里箭頭希古恩，協助布魯日先拔頭籌，小讓平半只得1.67倍咁低水備受睇好，呢個上盤快啲入貨。