紅魔煞停 衝鋒車

猪拉多纳

着火馬達首度倒戈史丹福橋

今晚球壇焦點，唔使問都知係車路士惡鬥曼聯呢場英超大戰。雖然紅魔要後上爭冠係冇乜機會，但以佢哋最近連贏6場嘅強勢，冇嘢係冇可能。況且今戰係「翻生鬥牛兵」桑馬達首度重返史丹福橋倒戈，相信佢實會大打身價波，證明舊帥莫連奴唔識貨，出盡全力煞停呢架爭冠衝鋒「車」，一於撐曼聯捧1.85倍「讓球客勝」！
曼聯尹佩斯復出 3將缺陣

曼聯家陣排喺聯賽榜第3，落後「一哥」車路士8分兼踢多場，相信領隊尹戈爾同廣大「紅魔躉」嘅心願，極其量都只係爭番個亞軍，心理壓力唔大，亦係最近贏到開巷嘅主因。查實紅魔最近聯賽6連捷咁順，除咗話一班中前場戰將包括費蘭尼、艾舒利楊格同安達靴里拉交足貨之外，桑馬達全面回勇都係一大關鍵。

呢位西班牙左腳仔早排喺「雙紅會」梅開二度，上仗「曼市打吡」又有進帳，狀態正值巔峰。最重要係，今仗係桑馬達畀車路士賣走15個月後，首度重返史丹福橋倒戈。佢賽前向英國《鏡報》表示好感激「藍戰士」對佢嘅知遇之恩，但心入面仲有團火，就係要證明車仔賣走佢係錯誤決定，希望帶領曼聯力爭7連捷，阻延舊會嘅爭標大計。雖然菲爾鍾斯、戴利白蘭特同卡域克今場養傷缺陣，但荷蘭射手尹佩斯已經傷愈，戰鬥力唔使懷疑。
車仔跌Watt勁食「魚生粥」

車路士接近3個月未輸過波，但呢隊「一哥」近仗表現冇乜霸氣，連續3仗砌低侯城、史篤城同昆士柏流浪3支下游隊伍都僅勝1粒。上仗面對護級分子QPR亦踢到冇碇埋手，如果唔係法比加斯臨完場前一箭定江山已經失分，今鋪點睇都唔似會讓得起大勇嘅紅魔，捧「讓客」啱數！

（now621台周日凌晨0:30直播）
盤路解碼

車仔今季主場25戰開出15口細，比率達60%。
Data King：交手旺開入球細

‧車路士近12次聯賽主場鬥曼聯，錄得7勝4和1負。

‧法比加斯對上7次喺史丹福橋球場出戰英超，並未交出任何入球同助攻。

‧紅魔英超6連勝。

‧雙方近5次交手開出4口入球細。
乜都玩錦囊：車仔穩陣波玩埋細

車仔對強隊向來穩陣行先，加上冇咗首席「士哥拿」迪亞高哥斯達，中場大腦法比加斯下半季又跌晒Watt，對住回勇嘅紅魔唔係咁易咬得入，都係揀1.68倍入球細穩陣。