拉素下盤趁「祖」買

猪拉多纳

慎防歐聯兵團留力

歐聯賽事白熱化，周中踢完八強首回合，緊接下周中就會上演次回合，本周聯賽夾喺中間，球隊有所取捨係人之常情，尤其係聯賽有失分空間，例如祖雲達斯同摩納哥，呢兩隊今晚就未必會去盡，讓到半一咁多，不妨考慮對家拉素同埋雷恩嘅下盤啦。

先講祖雲達斯主場對拉素（TVB301周日凌晨2:45直播），祖記目前喺意甲一枝獨秀，已經領先第2位嘅拉素12分，聯賽冠軍可以話係囊中物，今仗就算贏唔到，對爭標影響唔大，畢竟祖記已連贏3屆聯賽冠軍，屆屆仲要都贏到開巷，難得今屆歐聯踢得好兼抽到靚籤，八強首回合又有1球領先優勢，幾大都留力周中搏埋佢。
歐聯先至搵到真銀

事實上，歐聯對一隊豪門營運非常重要，尤其係歐聯轉播收入特別多。以上屆為例，祖記分組賽出局，獎金收入達4,309萬歐元（約3.61億港元），若今屆成功殺入4強甚至決賽，收多千幾二千萬歐元落袋唔係難事，所以祖記必定會將注意力放喺歐聯，上場聯賽爆冷不敵帕爾馬除咗因為輕敵，分心歐聯亦係原因之一，加上保羅普巴養傷削弱攻擊力，今場真係未必贏到狀態極勇嘅拉素。
拉素三箭聯賽轟27球

踏入下半季狀態弗爆嘅拉素，除殺入意大利盃決賽，聯賽亦已連贏8場，前線三叉戟高路斯、菲臘安達臣同埋簡達華入球停不了，今季聯賽共射入27球，全隊總入球喺祖記之上，由於拉素入球點分散，對手可謂防不勝防，今場受讓半一，1.69倍值得博。
雷恩下盤降「摩」

另一場摩納哥主場對雷恩（TVB302周日凌晨2:00直播），摩納哥目前落後榜首里昂6分、落後第2位巴黎聖日耳門4分兼多踢1場，爭標機會唔算大，有得揀點都博歐聯先。畢竟摩納哥今季放走多件主力後，板櫈深度冇以往咁強，兩線作戰未必應付到，況且摩納哥主場球迷少，一向冇乜地頭威力，今季聯賽主場成績仲差過作客，今場讓半一梗係捧1.95倍下盤。
樂比推介：拉素（下盤）、雷恩（下盤）