維羅納撼費倫未驚過

猪拉多纳

東尼「回家」騷哥利

今晚意甲獨腳戲，費倫天拿主場對維羅納，焦點肯定係著名射手東尼；今仗重返成名地倒戈鬥「紫百合」，東尼當然要「騷哥利」回饋Fans支持。費倫天拿有歐霸盃後顧之憂，未必去盡，維羅納受讓捧讓球客勝。

（TVB 301周二凌晨2時45分直播）

東尼曾經兩度効力費倫，其中以05至06球季最威水，以三十一球榮膺意甲神射手，成為近半世紀以來首位單季意甲入波超過三十球嘅球員，並奪得歐洲金靴獎，最重要係協助意大利捧世界盃冠軍。東尼喺費倫球迷心目中擁有超然地位，今次「回家」相信仍會獲主隊Fans支持，等睇佢表演。事實上，37歲嘅東尼仍然寶刀未老，今季聯賽已轟入15球，認真犀利。維羅納近期亦時有佳作，包括打和羅馬以及擊敗拿玻里，唔怕前列分子費倫天拿。
紫百合留力爭歐霸盃

費倫天拿打入聯賽前三嘅機會已愈來愈低，應會專注歐霸盃，皆因冠軍可以參加下屆歐聯。「紫百合」上周中歐霸盃八強首回合，作客同基輔戴拿模打和1比1，將於周中返回主場再同呢支烏克蘭勁旅決生死，權衡輕重之下，今場聯賽相信會有所保留，留力亦好合理，仲要讓波制唔過！