祖記玩守細波

猪拉多纳

Lead住摩納哥1球歎慢板

今晚歐聯續演8強次回合賽事，摩納哥會坐鎮主場迎戰祖雲達斯。兩軍首回合接戰以穩陣行先，結果「斑馬軍團」憑住維達爾喺下半場射入12碼，埋單小勝1:0完場。落後嘅摩納哥今晚梗係希望收復失地，之不過佢哋鋒力唔算強，未必咬得入防守力唔差嘅祖記，1.5倍入球細係不二之選。

（有線62及202周四凌晨2:45直播）
主隊生牯仔歐聯啞火

摩納哥近況普普通通，法甲連同歐聯在內，近5場淨係贏得1場，當中除咗鬥卡昂清脆淨勝3:0外，其餘4場未試過入多過1球。雖然前鋒安東尼馬迪爾同中場貝拿度施華呢兩個後生仔狀態唔錯，近4場聯賽包辦摩納哥5個入波，但值得留意嘅係，呢對生牯仔去到歐聯戰場即刻啞火，至今都冇斬獲，要撕破祖記防線難度唔細。

祖雲達斯周日意甲主場以2:0輕取拉素後，近8場賽事7勝1負氣勢勁爆，賽後教頭阿里基仲讚自己班波夠經驗，就算周中有比賽，班球員都唔會覺得攰喎！

又難怪阿里基咁牙擦嘅，佢哋除咗體力驚人外，球員技術亦毋庸置疑，「野獸」泰維斯近排弗到漏，配合鬥拉素避戰嘅艾華路莫拉達攻堅，絕對有力搵到食，就算維達爾因為急性扁桃腺發炎未必踢得，佢哋都有老將派路喺中場控制比賽節奏，首回合又取得領先優勢，今場大有條件歎慢板，再靜候反擊機會，如果拎埋個作客入球喺手，隨時收韁拖到完場添，捧「細」啱數。
盤路解碼：兩軍過去3次歐聯碰頭全開「入球單」。