西維爾蓄銳唔赦辛尼特

猪拉多纳

今晚歐霸8強次回合矚目之戰，衞冕嘅西甲勁旅西維爾作客俄超一哥辛尼特，雖然後者今仗有「變形俠醫」侯克在內四名球員坐完波監復出，但西維爾日前聯賽不惜失分都要進行大輪換，讓多名主力抖到夠，擺明車馬係搏歐霸喇，今仗仲有得受讓咁筍，斯維力撐讓球客勝。

（有線64及203台周五凌晨3時05分直播）

辛尼特喺俄超就蝦蝦霸霸，出去打歐洲賽多數都變軟腳蟹。辛尼特首回合作客輸1比2，雖然搶到一個作客入球，今場又有侯克、尼艾維斯、基斯薛圖及施莫尼哥夫刑滿復出，牌面唔錯，不過呢班兵總係予人各自為戰嘅感覺，就算有地利都不宜高估。

貴為上屆盟主，加上奪冠可取得下屆歐聯入場券，西維爾爭取蟬聯嘅決心唔使懷疑，主帥艾美利深明眾將於上仗反勝辛尼特搏得好盡，特登喺日前聯賽對ＣＦ格蘭納達進行大輪換，讓班尼加在內嘅7名喺首回合打正選嘅球員休息搞到失分，令爭前四機會大打折扣，不過從另一面嚟睇，西維爾非常重視歐霸，絕對唔赦辛尼特。況且喺2005-06年度球季，西維爾咁蹺於8強淘汰辛尼特，之後一路奏凱捧走歐洲足協盃（歐霸前身），斯維認為佢哋今仗可頂住唔輸殺入4強，讓球主客和仲受讓一球，讓球客勝咪走寶。
布魯日受讓無迪手

另一場8強次回合，烏克蘭迪尼普主場硬撼比利時勁旅布魯日，雙方首回合打成0比0，雖然布魯日未能藉地利先拔頭籌，但亦冇失作客入球，查實佢哋連埋外圍賽在內，喺歐霸取得11勝4和，係今屆唯一不敗之師。迪尼普雖有中場沙高夫坐完波監，但輪到前鋒費杜祖克停賽，攻力受削，點讓得起金身未破嘅布魯日呀？一於捧布魯日讓球客勝。

（有線63台周五凌晨3時05分直播）