拿玻里細味禾夫斯堡

猪拉多纳

意甲雙雄拿玻里同費倫天拿今晚喺歐霸盃8強次回合分途出擊，由盃賽專家賓尼迪斯領軍嘅拿玻里喺首回合大炒德甲禾夫斯堡4比1，出線冇懸念，今晚返去主場作戰，預料會睇定嚟食，拿玻里細盤必捧！

（有線61及201台周五凌晨3時05分直播）

賓尼迪斯呢個盃賽專家真係好堅，無論係帶華倫西亞、利物浦、國際米蘭定車路士，都一定會有盃落袋，到執教拿玻里亦攞到意大利盃同意大利超級盃。嚟到歐霸盃，拿玻里喺8強首回合作客禾夫斯堡一仗被睇低一線，皆因「狼堡」主場實在太犀利，連拜仁慕尼黑去到都要輸波，勢估唔到賓尼迪斯一樣有辦法令拿玻里大勝而回。「狼堡」今場仲有前鋒肯特因傷缺陣，作客想翻盤睇怕都好難，相信賓尼迪斯今場都會使出拿手好戲，穩守行先，守到「狼堡」一戙都冇。
費倫夫添打爆基

至於「紫百合」費倫天拿出線亦有優勢，首回合作客烏克蘭球隊基輔戴拿模打和1比1，取得寶貴嘅作客入球，「紫百合」已經爭唔到下屆歐聯資格，球隊全心爭逐歐霸盃，上場聯賽敗於維羅納一仗，主帥蒙迪拿收起部分主力，明顯係留力備戰今場，球隊更有後衞荷西巴辛達刑滿復出，面對有前鋒達高域要停賽嘅基輔，有力贏波出線！

（有線62及202台周五凌晨3時05分直播）