噴射機+1好着數

猪拉多纳

例行公事 獅吼Hea踢

澳職踏入最後一輪常規賽，部分比賽已變成例行公事，包括今日布里斯班獅吼主場對紐卡素噴射機，獅吼篤定以「第六位」進身季後賽，球隊現時將全副精神放落亞冠盃，好可能派副選敷衍今場「冇意義」嘅聯賽。至於噴射機無緣季後賽，但都唔想包尾過終點，加上作客兩連勝唔可以睇小，受讓之下，噴射機讓球客勝博得過。

（有線64及203台周五下午5時40分直播 ）

由於珀斯光輝違反聯賽薪酬條例，被澳洲足總判罰常規賽結束後降落第七位，意味現時第7位嘅獅吼，屆時可自動升上第六位，穩奪季後賽資格。獅吼周中亞冠盃作客擊敗FC北京，保持出線曙光，但下輪對浦和紅鑽就非勝不可。因此，獅吼極大機會「放棄」今仗無關痛癢嘅澳職常規賽，畀一眾主力有充份休息，專心準備亞冠盃生死戰。事實上，獅吼近期主場成績好曳，近五次主場出擊輸咗四場，加上有亞冠盃後顧，讓波實在信唔過。
唔想包尾全力求勝

另一邊廂，雖然話澳職不設降班制度，但相信紐卡素噴射機亦唔想包尾咁失禮，佢哋只係落後今季大跌Watt嘅尾二球隊西悉尼流浪者一分，仲要有機會擺脫榜尾污名，今仗應會落力求勝。值得留意，噴射機早前爆冷作客擊敗榜首墨爾本勝利，真係唔嘢小，今仗遇上無心戀戰嘅獅吼，噴射機應該有分落袋，讓球主客和獅吼讓一球，梗係捧有2.12倍嘅噴射機讓球客勝啦！