紐卡素內亂自殘 難擒天鵝

猪拉多纳

評價一班波嘅實力，除咗球員狀態領隊功架外，管理層水平同更衣室氣氛都係重要參考因素。紐卡素近期士氣衰到貼地，原因係球員之間分黨分派欠互信基礎、領隊又駕馭唔到班人、連球迷都睇唔過眼抗議班主無能，下半季成績大插水可謂順理成章，今日主場迎戰史雲斯讓唔起平半，捧下盤。

（now631、668台周六晚10:00直播）

自從柏杜季中離開紐卡素後，「喜鵲」可謂交上惡運，接手嘅卡華名氣同經驗不足，領軍以來15場賽事僅得2勝3和10負劣績，最近仲受傷兵困擾，人腳唔齊下更連輸6場，今仗佢哋依然有柏比斯施斯同穆沙施素高停賽、路蘭度艾朗斯、史提芬泰萊、迪奧迪、希達拉同杜密特養傷，陣容甩皮甩骨，睇怕難全身而退。
將帥不和訓練場嘈交

再講吖，其實一直以來紐卡素喺更衣室內都唔係咁融洽，一班法語系球員同本土球員一向有心病，幸前領隊柏杜尚算控制到場面，班波落到場都肯砌盡，弊在自卡華接手後軍心散漫，各自為戰，好多球員都諗住季尾走人，好似約拿斯古迪利斯早前仲冇大冇細，喺訓練場上同卡華嘈交，雖然傳媒報道兩人已冰釋前嫌，不過就揭露咗呢班波內部充滿矛盾。
班主唔買人球迷搞示威

至於球迷對班主艾殊利嘅不滿更係到達極點，除咗發起今仗34分鐘站立示威，以抗議艾殊利收埋3,400萬英鎊收入（約3.94億港元）唔用來擴軍增強實力外，更打算去艾殊利旗下嘅運動連鎖店門外示威「倒米」，有個咁嘅老細簡直係自殘。

另邊廂嘅史雲斯去到季尾無欲無求，不過佢哋冇因為咁以放軟手腳，目前保持前8位置，領隊蒙克坦言希望藉紐卡素內亂而得益，爭取最高排名衝線，有鬥心值得支持。
樂比推介

史雲斯（下盤）