疲兵客戰切爾達 皇馬半和好路

猪拉多纳

今晚西甲由「二哥」皇馬守尾門，作客撲擊切爾達。皇馬牌面上好似超班，但查實「銀河艦隊」傷兵唔少，啱啱歐聯8強次回合淘汰馬體會又搏得太盡恐怕未回到氣，切爾達向來防守硬淨，遇強唔會輕舉妄動，相信初段可頂得兩嘴，斯維力撐半場和。

（now 632周一凌晨3時直播）

先講一段小插曲，話說皇馬上周中歐聯8強次回合對馬體會賽前熱身嗰陣，王牌C朗一腳重炮射咗上看台，意外省中咗個細路，好在冇乜大礙，C朗知道後即刻衝上去搵呢名細路耍冧，仲送咗件練習衫畀佢，愛心爆棚，可能好心有好報，嗰場波C朗末段助攻畀「小豌豆」查維亞靴南迪斯奠勝。

雖然贏波晉級，但皇馬眾將面對馬體會嘅瘋搶戰術都砌得好盡，邊有咁快回到氣。除此之外，中前場主力如賓施馬、加里夫巴利及莫迪歷因傷繼續倦勤，「BBC」剩番C朗撐住，今場進攻火力點都爭啲。
切爾達主場遇強特醒

切爾達今季站穩中游位置，既冇份爭下屆歐洲賽資格，亦唔愁降班，依家係踢緊風流波，不過佢哋喺主場對親強隊特別起勁，月頭曾令巴塞陷於苦戰，靠住頑強防守最終僅輸一粒，佢哋亦曾贏過馬體會同逼和華倫西亞，絕對唔嘢小。皇馬上季造訪呢個巴拉多斯球場更淨吞兩蛋，徹底粉碎其爭奪聯賽冠軍嘅美夢，今次重返呢度比賽必定小心翼翼。況且「銀河艦隊」之前10次作客有7次開半場和，疲兵應戰下再開半和機會高，如果想博更好分頭，不妨吼埋有4.3倍嘅和客。