皇馬弗爆圍攻切爾達

猪拉多纳

C朗照住「小豌豆」

西甲 03:00（日）60 切爾達 Vs 皇家馬德里

今晚西甲有場大戰，由切爾達迎戰皇家馬德里。皇馬喺周中歐聯殘陣出擊，結果憑鮮有上陣機會嘅「小豌豆」查維亞靴南迪斯一箭定江山，1球淘汰馬德里體育會，再次證明皇馬兵力係幾咁雄厚！「小豌豆」為咗博留隊，嚟緊更加要把握機會入多兩粒，「張峰」認為皇馬可以克服傷兵問題大勝一場，撐皇馬2.25倍「讓球客勝」。

「銀河艦隊」喺7日內一次過冇咗賓施馬、加里夫巴利同莫迪歷3名常規主力，戰鬥力難免大幅下降，不過大家唔使怕喎，事關C朗近期狀態勁弗，擔得起成隊波，而且「艦隊」啱啱先贏完死敵馬體會，士氣肯定高到爆晒燈啦！再講，家陣皇馬只係落後榜首嘅巴塞2分，要繼續咬住巴塞爭冠軍，呢3分真係不容有失。
「小豌豆」砌盡博留隊

值得一提嘅係，教練安察洛堤周中將沙治奧拉莫斯推上中場做掃蕩，鋒線則起用查維亞靴南迪斯擔大旗，效果可以話係相當理想。

事實上，「小豌豆」每次上陣都交足貨，效率一流，賽前有消息話皇馬或者會用1,000萬歐元買斷呢位曼聯借將，不過就暫時未出手住，「小豌豆」想留喺「艦隊」，梗係要繼續施展渾身解數啦，配合弗到冇朋友嘅C朗，皇馬今鋪真係贏少粒都唔制！

對家切爾達家陣喺聯賽排第9，高不成低不就，大可以踢風流波。雖然切爾達近3場拎到2勝1和，不過咪畀個績呃到，事關佢哋嘅對手只係下游球隊，發揮理想好正常！今晚嘅對手換上要搏命嘅皇馬，梗係另作別論，淨係決心都輸一大截啦，點阻到皇馬大勝呀？

（now632周一凌晨3:00直播）