金澤唔使讓波勁鬼！ 平手撐熊本仲實際

猪拉多纳

日乙 15:00（日）13 熊本羅亞素 Vs 金澤薩維根

一支包尾三渣波主場對住日乙「二哥」，居然仲有平手盤玩咁着數？呢個似係氹多過筍盤，所以今日熊本羅亞素對金澤薩維根場波，不妨博吓個熊本2.09倍「平手主勝」。

今日博熊本其實唔老利，事關佢哋為咗造勢谷觀眾量，準備咗5,000份禮物益球迷，弊在呢5,000份禮居然係盒裝紙巾，好衰唔衰，佢哋由第4周起，連續5戰得1和4負，真係輸到喊，今日送啲咁嘢，唔通預咗班Fans又要喊晒口咁走？
熊本主帥執防線博反彈

撇開呢樣咁唔吉利嘅禮品，熊本亦真係爭唔落，近5場波贏唔到不特止，仲要只入2球失9球，衰到震。可能為咗沖喜啩，熊本幾日前開咗個股東大會，宣布連續兩個季度有盈餘，同時增資7,000萬日圓，創會11年嚟終於消除債務，幫班人打咗支強心針。

但係打波單靠信心係冇用嘅，熊本主帥小野剛呢排都狂執啲防守、兩邊出波同埋前鋒射門，希望今日反彈。查實熊本班主力老就係老咗啲，不過養父雄仁、鈴木翔登、上村周平以至卷誠一郎，職業比賽經驗豐富，只要打醒精神，主場起碼有條件守和。

最重要一點係，日乙新丁金澤呢期好旺，由第4周起5連勝，中場清原翔平8場波射16腳入咗7球，腳風順到無倫，以佢哋嘅走勢，理論上今日可以o趙硬熊本，連日本網民嘅菠菜戰果預測，都出現75%人買金澤客W，完全一面倒，何況金澤今場只要贏波，同時磐田又失分嘅話，佢哋就會升上榜首。強勢衝榜首嘅一隊，正常情況應該係坐和望贏，今次竟然仲有平手盤畀大家玩，會唔會筍過龍呢？都係便宜莫貪，博番熊本反彈好啲。