慕遜狼堡演德甲Big4大戰

猪拉多纳

德甲今晚上演「Big4大戰」，「4哥」慕遜加柏主場迎戰「老二」禾夫斯堡，開「入球大」機會極高！事關慕遜係家陣德甲狀態最好嘅球隊，前線三叉戟狀態弗爆，禾夫斯堡作客嘅入波能力亦係德甲第2勁，既然大家都咁猛火，梗係強捧1.7倍大啦！

（有線61、64、201及203周日晚11:30直播）
慕遜三叉戟7戰入12粒

慕遜近排着晒火，搏命搶分爭入前3直入歐聯分組賽，近9場聯賽未逢一敗，除咗上周畀法蘭克福悶和，之前連續6場聯賽都攻入對手2球或以上，強如拜仁同多蒙特都分別畀佢哋轟入2粒及3粒，麥斯古斯、拉菲爾基達奴同靴爾文呢個進攻鐵三角，近7場聯賽夾埋更加喪入12球，今晚主場出擊，想食蛋都難啦！

作客嘅禾夫斯堡目前個「2哥位」相當穩陣，所以近排佢哋將焦點放喺歐霸盃，搞到聯賽成績下滑，之不過隨住佢哋4強出局，依家重新專注聯賽，表現肯定會好番啲，況且荷蘭國腳巴斯杜斯級數極高，一對進攻主力奇雲迪布尼同舒賀爾尼，又有機會復出披甲，夠晒條件同慕遜加柏駁火！咪忘記禾夫斯堡嘅快速反擊喺作客特別啱使，今季14場客戰平均每場入超過2球，今鋪去到慕遜地頭未驚過啦！
頂占筍盤：慕遜加柏（入球大）