好波又有品 美斯確係犀飛利

猪拉多纳

大家有睇巴塞隆拿上場歐聯點贏拜仁慕尼黑，就知道美斯有幾咁犀利。拜仁嗰場波捱到70幾分鐘，由於球員唔集中，加上主帥哥迪奧拿諗住有機可乘，可以攻巴塞而放棄穩守。但撞正巴塞係踢4-2-3-1嘅雙防中陣式，喺嚴密防守下最終令拜仁吞3蛋而回。

巴塞上場波有拿傑迪錫同布斯基斯打雙防中，令前線只需美斯、尼馬、蘇亞雷斯嘅「MSN」組合，加埋中場發電機恩尼斯達就已經夠殺，就連沙維都要做後備。由此可見巴塞除咗唔想畀拜仁攞到作客入球外，亦冇睇小呢個對手。當然喺嗰場波入兩球嘅美斯真係「犀飛利」，佢唔單止球品好、而且靜如湖水動如脫兔，帶波好似珠走玉盤，英文叫「Smooth as silk」，Peter實在非常欣賞佢。美斯冇乜緋聞而且生活淡如水，只有喺球場表現「標青」，呢啲先係抵讚抵錫嘅球王吖嘛！
今晚純睇波為上着

領先3球嘅巴塞今晚作客一定會踢得小心翼翼，睇住個鐘嚟比賽，喺贏和輸都可以晉級嘅情況下，呢場嘅投X方向好唔清晰，Peter認為都係純睇波為上着。想投X嘅話不如留番明晚皇家馬德里主場鬥祖雲達斯，呢場波皇馬同祖記上半場相信都會踢得比較謹慎，所以半場入球細同0比0波膽都有機會勝出，值得小敲！
金句：美斯係動若脫兔，靜如湖水的球王