巴塞封王體定嚟食

猪拉多纳

3冠王第1關 贏波即搞掂

今夜西甲重量級大戰，榜首嘅巴塞將作客「三哥」馬體會，「地上最強」只要今仗贏波便可提前封王，並為今季「三冠王」之路踏出重要一步，戰意唔使懷疑，西班牙傳媒賽前大爆球王美斯與領隊安歷基「將相和」內幕，成為季中一路狂飆嘅關鍵，何況馬體會最唔想宿敵皇馬後上奪冠，隨時會讓路，因此巴塞雖有蘇亞雷斯有微傷倦勤，但斯維仍然強捧巴塞客W。

(now 632及TVB 13周一凌晨1時直播)
西媒爆「將帥和」內幕

先提大家西甲剩番兩輪，出於公平關係，今輪與煞科日賽事均會在同時間舉行。現時由於巴塞領先次席皇馬4分，只要在最後兩輪贏其中一場便可奪冠，為免夜長夢多，梗係今仗擊敗馬體會提早完成任務啦！心水清嘅球迷或者記得，年頭巴塞作客皇蘇，主帥安歷基因賽前同美斯吵大鑊而特登唔畀佢打正選，搞到輸波收場引起軒然大波，有傳美斯堅唔妥安帥，後者被傳帥位不保，點解此事過後「地上最強」反而從谷底反彈，豪取28勝1和2負邁向「三冠王」之路呢？

近日西班牙傳媒就揭開謎底，話說當時美斯嬲到冇請假缺席第二日嘅操練，好彩隊長沙維做和事老，先勸呢位球王唔好搞大件事影響成個球季，美斯意識到自己做錯，主動Whatsapp鼓勵隊友：「如果再咁落去就一無所獲，我哋唔可以再讓今季屬於白色（皇馬）。」並喺全隊放假時自動自覺加操，安歷基見佢咁識做亦冇罰佢，呢場「將相和」成為季中狂飆嘅關鍵。
馬體會或做順水人情

隨住西盃同歐聯殺入決賽，巴塞當然想先攞聯賽錦標，踏出「三冠王」第一步。雖然馬體會賽前話唔會放軟手腳，但斯維覺得係口是心非，因為同「床單兵團」最大仇口並非巴塞而係同市宿敵皇馬，所以佢哋最唔想「銀河艦隊」奪冠，而佢哋歐聯席位亦好穩，因此不如做個順水人情益吓巴塞。

更何況「床單兵團」自歐聯出局後成隊波有啲謝謝地，之前兩場只能賽和實力麻麻嘅利雲特及畢爾包，就算想阻都未必阻得住弗爆並對3分志在必得爆嘅「地上最強」呀？ 巴塞客W有1.6倍實屬不二之選。