哥登堡遇弱 半場執盃耳

猪拉多纳

瑞超踢咗8輪，排喺榜首竟然唔係實力超班嘅馬模，而係表現穩定、防守超強嘅哥登堡，今晚呢支瑞超「一哥」將會轉戰瑞典盃決賽，於主場迎戰瑞超包尾大幡奧雷布洛，兩軍狀態天與地，梗係捧讓球主勝喇，玩埋哥登堡半場勝都得呀！

（周日晚9時30分開賽）

車路士喺英超憑住穩健防守封王，今季嘅哥登堡亦有樣學樣，進攻當然冇馬模咁強，不過就憑住穩固嘅防線，踢咗8輪瑞超只失4球，成功以1分力壓馬模排榜首，今場嚟到一場過嘅瑞典盃決賽，哥登堡更係不容有失！
奧雷布洛跌Watt冇瓣掂

哥登堡今次喺決賽對住奧雷布洛，可謂已經手執半隻盃耳，全因奧雷布洛狀態實在太曳，近7場輸足6場，場場都至少失兩球，咁嘅狀態同防守點會爆冷到呀？上季瑞超排第6嘅奧雷布洛今季大跌Watt，好大原因係主力射手艾哈辛卡馬拉因傷缺陣，今場繼續冇佢，哥登堡料可以輕鬆贏波。