奧脫福謝幕Party 曼聯平手秤仙

猪拉多纳

英超踏入尾聲，只係剩餘兩輪聯賽，除咗車路士提前封王之外，曼城、阿仙奴同曼聯嘅前4席位亦幾乎塵埃落定。今晚英超將會上演「仙魔大戰」，由曼聯主場火併阿仙奴，排第4位嘅「紅魔」依家以2分落後少踢1場嘅「兵工廠」，如果今場贏波仲有機會殺入三甲，爭取直入來屆歐聯分組賽資格，加上今場係佢哋嘅英超主場謝幕戰，相信會踢得分外落力，今場開平手盤梗係撐「紅魔」啦！

（now621台周日晚11:00直播）

曼聯現時拋離第5位嘅利物浦6分，數字上最後兩場只要拎多1分，就肯定可以前4衝過終點。但睇埋得失球差嘅話，「紅魔」足足拋離「紅軍」14球咁多，所以其實就算佢哋兩場輸晒，「四哥」個位都勁穩陣。雖然係咁，不過曼聯唔係無嘢爭，因為第4名要出戰來屆歐聯附加賽，相信佢哋為咗壓過阿仙奴殺入三甲，今場主場謝幕戰實會使出渾身解數砌低對手啫。
尹佩斯好番倒戈

再講吖，曼聯兩個月前喺奧脫福不敵阿仙奴，搞到英總8強出局，今晚再度交手肯定搏盡一雪前恥！雖然曼聯隊長朗尼上場鬥水晶宮受傷，今場唔使預佢，但好在最近受病毒感染要養病嘅尹佩斯已經好番晒，今晚能夠披甲倒戈舊主，加埋桑馬達、安達靴里拉呢對「鬥牛孖寶」幫手鋪橋搭路，要「爆廠」話咁易啦！

另邊廂，「兵工廠」喺下半季表現明明相當架勢，但上輪竟然喺酋長球場爆冷輸畀史雲斯，皆因全場多次射門都被前門將法比安斯基救出，仲要喺比賽尾段時間失守，搞到最終輸波而回，兼夾將「二哥」位置拱手相讓畀曼城！論近況同戰意都係曼聯佔上風，而且有埋主場之利嘅幫助，平手盤一於捧「紅魔」啦！
盤路解碼

「紅魔」今季開出平手盤賽事未輸過，分別有2次贏盤同1次走盤。