贏即封王！賓菲加等歎細界

猪拉多纳

葡超今季改制增至18隊角逐聯賽錦標，不過對賓菲加嚟講，睇怕改制無礙佢哋再一次成為盟主。今晚賓菲加作客甘馬雷斯，只要贏波即可以達成聯賽兩連霸目標，計落冇必要大數對手，2.05倍入球細抵玩。

（有線155周一凌晨1:00直播）

賓菲加目前以3分領先波圖，由於對賽成績佔優（1勝1和），聯賽又只係得番兩輪，所以只要賓菲加今晚贏波即可提前封王。
甘馬雷斯主場守得下

難得賓菲加一對箭頭洛迪高利馬、莊拿斯干卡維斯呢排都Fit到震，2仗夾埋包辦6球，邊使驚班波突然失準？不過球隊目標只係3分，與其數多2粒錦上添花，不如實際啲保住勝局，領先後拖到完場唔奇。

至於排第5位嘅甘馬雷斯目前以7分拋離第6位嘅費利拿，換言之佢哋已經鎖定下屆歐霸盃參賽席位，鬥心梗係冇賓菲加咁強。但考慮到班波今季主場16戰只係失咗7球波，防守有番咁上下，就算輸都唔會輸得太肉酸，咁嘅情況，呢場入波睇怕唔慌多得去邊。