窮鬼金澤諗計做「細」界

猪拉多纳

日乙榜首戰訪千葉

日乙 15:00 （日）11 千葉市原 Vs 金澤薩維根

要揀今季日乙神奇球隊，唔使講人人都揀金澤薩維根。呢支上季日丙冠軍窮到燶，居然可以10戰不敗，仲上過榜首做「1哥」，認真唔簡單。今日佢哋作客千葉市原，係一場榜首之爭，「最強對最強」，撼出個1.57倍入球細出嚟好正常。
科蘭年薪貴過金澤班費

金澤到底乜料，唔係咁多人了解，一般只知佢哋新升班，開季13場只輸兩場，前個星期上過榜首，依家同千葉同得27分，只係輸得失球排第3，僅落後磐田山葉1分。換言之，假如磐田失分，金澤、千葉今日邊隊勝出都即刻榮升「一哥」。

咁勁嘅一支球隊有乜把炮呢？答案係：冇！秘訣係個窮字。呢支石川縣球隊成年經費預算得5.5億日圓（約3,574萬港元），係日乙球隊平均預算嘅一半，大阪櫻花前鋒科蘭嘅年薪6億日圓，已經多過晒佢哋全隊使費。金澤冇一個球員嘅年薪超過1,000萬日圓（約65萬港元），有啲小將仲要喺咖喱店兼職至維到皮。正因為窮，又真正熱衷足球，金澤隊波好團結有鬥志，佢哋嘅人盯人防守簡直貼過黐身膏藥，開季13戰只失7球，冠絕日乙嘅防守，就係佢哋嘅本錢。

相比之下，千葉各方面資源都好過金澤，森本貴幸、保連奴、水野晃樹呢啲高薪球員，都有外流同日職經驗，左路嘅谷澤達也、中村亮太中後場組合，更被稱為日乙質高左面邊線，理論上贏面較高。但係金澤同樣有條勁爆「右Side」，入咗8球嘅清原翔平搭後衞辻尾真二，公認係日乙至強右線，同千葉強強對碰，會產生牽制作用，大家都未必咁易有作為，博入球細就最好。

仲要提提大家，金澤因為窮得滯，冇專用訓練場同辦公大樓，暫時攞唔到J1參賽證，即使攞到日乙冠軍都冇得升班，到季尾Hea吓唔奇，到時咪盲死追呀。