爭3冠格食格 斑馬飛踢藍鷹

猪拉多纳

意大利盃盟主即將誕生！今晚由拉素喺奧林匹高球場迎戰祖雲達斯，前者當然想重溫2012/13年球季捧盃美夢，偏偏呢隻「藍鷹」患上「斑馬恐懼症」多年，呢次對住力爭三冠王嘅「斑馬軍團」睇怕都係有心冇力，就算「藍鷹」受讓平半都信唔過，捧1.93倍上盤！

（now633台周四凌晨2:45直播）

上季聯賽排第9嘅拉素今季大躍進，除咗成功殺入意盃決賽外，目前聯賽仲以3分壓住拿玻里，下屆歐聯入場券幾近到手，真係要畀個「叻」主帥皮奧利。之但係「藍鷹」今季點勇都好，始終醫唔好球隊嘅「斑馬恐懼症」，近10次惡戰祖雲達斯只得2和8負嘅羞家戰績。今季聯賽亦2戰全敗兼吞咗5蛋。個病咁嚴重，睇怕就算皮奧利華佗上身，一時三刻都唔慌會醫得好。
近10次交手 拉素2和8負

至於對手祖雲達斯今季表現更加係冇得彈，已經有意甲錦標落袋嘅佢哋，正力求重演國際米蘭09/10球季嘅三冠王光榮戰績。雖然意盃地位相對較低，但話晒祖雲達斯對上一次捧起呢個盃已經係20年前，話球隊唔心郁就勢係假。主帥阿里基賽前都提醒球員唔好掉以輕心，又強調意盃都係重要目標之一，點到班波唔打醒12分精神先？
祖記莫拉達 坐波監缺陣

雖然Fit爆射手艾華路莫拉達今場要坐波監冇份踢，不過「斑馬軍團」前線仲有一對首席射手泰維斯同洛蘭迪攻堅，又有中場派路同保羅普巴穿針引線，火力仍然冠絕意甲，咪忘記呢班主力上仗全部冇份踢正選，養精蓄銳肯定更容易贏波捧盃啦！
Data King：斑馬交手例先入波

‧祖雲達斯近6次鬥拉素，取得5勝1和成績。

‧只要「斑馬軍團」捧盃，即可壓過羅馬成為贏得意盃冠軍次數最多球隊。

‧雙方近6次交手，「斑馬軍團」開出5口第一隊入球。
乜都玩錦囊：捧埋祖記第一隊入球

祖記今季有望爭三冠光宗耀祖，成班球員梗係唔想衰啦，動力點都比拉素大啲。況且「斑馬軍團」向來食住對手，當中不乏由頭贏到尾嘅比賽，既然呢鋪撐祖記贏波，就唔爭在揀埋佢哋1.78倍第一隊入球。
盤路解碼：拉素今季47戰開出29口大，大盤率約62%。