看守教練有料到 撐火車頭捧盃

猪拉多纳

俄羅斯盃決賽今晚爆發，莫斯科火車頭喺阿斯特拉罕中央球場對古賓，應該有辦法捧盃氹球迷，事關火車頭安排查列夫卓高接手領軍後，即刻大勝反彈，其次俄羅斯盃自1992年創辦起，莫斯科球隊未試過連續兩年失落冠軍，睇怕古賓都好難爆冷，捧2.58倍主W。

（開賽時間：周五凌晨0:00）
古賓3連敗近況頹爆

雖然火車頭最近1次捧走俄盃，已經係2007年，但佢哋以往6次入決賽有5次拎冠軍，咪話唔犀利。另外，火車頭上星期炒教練保沙域魷魚，繼上季後再次安排查列夫卓高做看守教頭，結果呢次賭博性行動好成功，日前火車頭喺聯賽主場以3:0大勝魯賓卡山，省番靚招牌。

仲有呀，自首屆俄羅斯盃開始，莫斯科球會未試過連續兩年失落錦標，意味上屆決賽冇莫斯科球隊後，今場火車頭應該會用最高速度，撞散古賓捍衞莫斯科球隊嘅尊嚴，鬥心唔需要懷疑。相反，古賓近況頹到爆已經連輸3場，首次入決賽好難爆得出，輸經驗相信要交下學費先！
俄盃賽制

今場為決賽，法定時間內打和將加時30分鐘，未分勝負即互射12碼決勝。

荷甲附賽制：採主客兩回合制，今輪為4強首回合。兩回合計打和，計算作客入球優惠，未分勝負則於次回合法定時間後加時30分鐘，加時階段仍計作客入球優惠，再和即互射12碼決勝。

自由盃賽制：採主客兩回合制，今輪為8強首回合。兩回合計打和，計算作客入球優惠，未分勝負則於次回合法定時間後互射12碼決勝。

墨季後賽制：採主客兩回合制，今輪為4強首回合。兩回合計打和，計算作客入球優惠，未分勝負則由聯賽排名較高一隊晉級。