銀河頹勢難讓侯斯頓

猪拉多纳

講起美職，相信大家第一時間都會諗起洛杉磯銀河、紐約紅牛等球隊，皆因佢哋不時搵到知名球星過檔，名牌效應自然易受注視。不過名氣大唔代表可以輕易贏波，聽朝美職名牌洛杉磯銀河主場迎戰侯斯頓戴拿模，前者頹勢未止，邊讓得起開始回勇嘅侯斯頓先？一於博2.28倍「讓客」！

（開賽時間：周六早上10:30）
鋒線啞火近5戰不勝

洛杉磯銀河今季繼續佢哋嘅巨星政策，嚟緊7月就會有英格蘭球星謝拉特來投幫呢班波「升呢」。不過遠水始終不能救近火，銀河家陣已經連續5場未贏過，上仗作客仲慘敗奧蘭多城0:4，士氣勁曳。前線更加係死晒火，近3仗得鋒將薩迪斯入到1粒，加埋首席射手羅比堅尼要掛免戰牌，咁嘅火力仲學人讓波，咪玩啦！
侯斯頓箭頭班尼斯回勇

另邊廂嘅戴拿模自從隊長巴特戴維斯復出後，成隊波表現生晒，而且球隊改踢4-4-1-1，前鋒韋爾布恩出任單箭頭後火力大增，連續2場士哥合計射入3球，加上前鋒基里斯班尼斯重拾射門鞋，協助佢哋自上年8月後再次取得2連勝。依家班波無論士氣定狀態都咁Fit，想連續3次作客銀河唔輸簡直係易絲執啦。