6弱困獸生死鬥

猪拉多纳

第52屆德甲今晚煞科，九場比賽同時於晚上9時30分上演，香港球迷可以欣賞當中四場直播。基於班霸拜仁慕尼黑已經提前贏得該會第25屆冠軍，四個參戰歐聯席位亦名花有主，今晚懸念主要係護級同歐霸入場券爭奪戰，當中焦點自然係護級大混戰，榜尾6弱哈化柏林、弗賴堡、漢諾威、史特加、漢堡同柏達邦鬥到最後一輪只相差四分，都未達安全線，當中仲有兩場係正面對決嘅困獸生死鬥，任何一隊都有可能逃出生天，邊兩隊需要直接降班，邊隊要踢護級附加賽，隨時要鬥到最後一場球證吹長雞至有分曉，肉緊到癲！

今晚最關鍵嘅護級戰，當然係柏達邦對史特加，同漢諾威對弗賴堡呢兩場護級分子直接對決，目前形勢上，6弱中以哈化柏林形勢最好，今晚作客對賀芬咸只要和波就穩保上岸，即使輸波，最終跌落尾三要踢附加賽嘅可能性都唔高，但其餘五隊就乜嘢可能都會發生，到時大家一路睇住電視直播，一路睇住積分表上6弱跳上跳落，夠晒刺激。
戲肉柏達邦肉搏史特加

兩場護級困獸鬥，直播場次係包尾嘅柏達邦主場對尾三史特加（有線62及202台直播），柏達邦冇得諗，只有贏波至可以壓過對手，仲要寄望漢堡贏唔到，至可以攞到尾三踢附加賽資格；史特加贏波可以確保逃出生天，若然和波都有可能直接降班，所以同樣非勝不可，呢場肉搏戰大盤得1.48倍熱到乏味，寧捧質態都勝一籌嘅史特加客Ｗ。至於冇直播嘅漢諾威主場對弗賴堡，弗賴堡季尾表現稍勝一籌，有受讓之利撐讓球客勝。