冠軍已袋使咩搏？ 捧強慎防踩蕉皮

猪拉多纳

祖記唔使讓波都咪制

歐洲各地聯賽去到尾聲，三支已經封王嘅班霸祖雲達斯、巴黎聖日耳門及賓菲加今晚不約而同主場打謝幕戰。三支名牌球隊牌面上無疑贏晒，但「冠軍已袋使咩搏」，加上仲有盃賽後顧，今輪呢啲名牌隨時Hea踢了事，捧佢哋場因住踩「蕉皮」呀。

意甲及意盃「雙料冠軍」祖雲達斯今仗「出事指數」高企，球隊剛於周中意大利盃決賽同拉素激戰120分鐘後捧盃，消耗唔少體力，加上贏完冠軍球員有所鬆懈，難怪今晚主場對拿玻里，莊家開平手盤，仲要客軍低水得1.75倍，一於跟大戶手影捧拿玻里。

（TVB 301周日凌晨零時直播）

無可否認祖記喺意甲超晒班，但球隊擸晒聯賽及意盃冠軍後，肯定將全副精神備戰6月7日凌晨歐聯決賽對巴塞隆拿，剩番兩場聯賽好大機會出副選，畀主力養精蓄銳，最緊要唔好增添傷兵。上仗意盃決賽已收起門將保方，更何況今場只屬例行公事，估計派路、泰維斯及基亞連尼都會抖下，加上列治史迪拿停賽，切勿高估。
拿玻里戰意贏晒

拿玻里喺歐霸盃出局後，想參加下屆歐聯，唯一途徑係打入聯賽前三位。佢哋落後「老三」拉素3分，由於拉素今輪鬥羅馬，隨時會失分，最重要係拿玻里煞科戰對手正係拉素，絕對有機會反超前。不過，拿玻里首要工作係做好自己，今場擊敗祖雲達斯，先至有價講，肯定當生死戰咁踢，起碼戰意已遠勝祖記，值得睇好。