巴塞盡炒歡送沙維

猪拉多纳

西甲煞科P！送拉科一程

巴塞魯營開P、歡送沙維！西甲今晚煞科，護級形勢仍然七國咁亂，由尾2至尾5合共4支球隊都仲有機會降班。排尾4嘅拉科魯尼亞相當危險，佢哋今晚仲要作客聯賽盟主巴塞，原本搶分機會已經相當之低，撞啱呢場仲係魯營謝幕戰兼沙維「歡送會」，巴塞又點會放軟手腳吖，一於正路啲，撐巴塞1.58倍「讓球主勝」開Party！

（now632台周日凌晨0:30直播）

上星期「張峰」有朋友去咗巴塞隆拿市旅行，仲影咗好多巴塞粉上街慶祝嘅相同影片添，氣氛一流，睇到「張峰」鬼咁羨慕。今晚西甲嚟到煞科戰，巴塞最後一次喺魯營球場上陣，肯定係一場盛大嘅祝捷派對！最重要一點，係忠心老臣子沙維賽前已證實離隊，喺今夏去卡塔爾掘金，美斯、恩尼斯達等合作多年嘅戰友，又點會畀佢帶住遺憾咁走呀？
美斯金靴仲有價講

即使唔計呢點，齋論實力，巴塞又何止高拉科兩班先？鋒線「MSN」弗到冇朋友，賽前有消息話蘇亞雷斯有些少傷，未必會正選披甲，但「蘇神」就算係後備落場，咪一樣夠殺！況且，本身係後備嘅柏度洛迪古斯，質素一樣唔曳，有尼馬同美斯傍住，要入波又有幾難呀？況且，美斯依家喺射手榜落後C朗4球排第2，但大家記住佢係「球王」美斯，喺佢身上冇嘢係冇可能發生，話唔埋今場會造就佢瘋狂入波搶金靴獎添，呢場預咗係入球Show都得喇！
拉科豆腐防線 隨時焗攻

巴塞開P，難為對家拉科仲要搏命，佢哋依家多尾3嘅伊巴同尾2嘅艾美利亞2分，對賽成績唔及艾美利亞，今場就算和波都唔安全，可想而知拉科承受幾咁大嘅壓力！係人都知，作客魯營焗攻幾乎同自殺冇分別，最慘係隊波本身防守又差，今季失咗成58球咁多，首循環主場都要大敗畀巴塞0:4，今晚輸少過3球都已經叻仔囉！
盤路解碼：巴塞近5次擊敗拉科都開「半贏全贏」。

Data King：巴塞近6次主場冇失波

‧巴塞近6戰主場全勝，斬獲19球不失1球。

‧雙方近9次碰頭，巴塞取得7勝2和。

‧拉科近17場作客開8次「半輸」及9次「半和」。