史特加逃生有人邦手

猪拉多纳

德甲煞科 護級七國咁亂

漫長嘅德國聯賽球季今個星期終於到最後一輪，今晚有線先同時直播4場德甲煞科戰，聽晚就輪到喺球彩台睇德乙，仲有兩回合「升/留班」附加賽，就會喺下周四同6月1號踢，今季聯賽就圓滿結束。

講到今晚德甲焦點，當然係亂到七彩嘅護級區啦，依家由包尾嘅柏達邦到第13位嘅哈化柏林都仲有降班危機，柏達邦今晚主場對尾3嘅史特加，雖有主場之利，但史特加今季對親下游球隊都威威，今晚絕對有力贏波上岸，就算作客讓平半都冇有怕，一於撐史特加上盤。

（有線62、202周六晚9:30直播）
季尾發力恰下游球隊

史特加5月頭仲係畀人睇死會降班，好在臨尾發力，連贏緬恩斯同漢堡攞足6分，前鋒丹尼爾真錫克近7場波入6球，兼交出2次助攻，係幫球隊殺出重圍嘅關鍵人物。翻查數據，史特加今季對住5間依家要護級嘅下游球隊，踢咗9場攞到4勝4和1負佳績，證明佢哋一旦要對同級，或者實力較弱嘅球隊，都好少甩拖，所以今場值得信賴。
柏達邦主場跌Watt

柏達邦依家排包尾，目標係升番上尾3，咁就可以同「德乙」季軍踢「升／留班」附加賽，算仲有一線生機。要達到目標，除咗要自己爭氣，今場一定要贏波之外，仲要望尾2嘅漢堡都失分。不過最弊柏達邦下半季主場成績好曳，7場聯賽得1勝2和4負，況且今場要焗攻，以佢哋嘅能力，咁踢咪等如自殺？就算喺主場都冇運行啦！
盤路解碼：史特加近5次「讓球」要讓波，4次開上盤。

Data King：柏達邦角球4連大

‧柏達邦近10場主場得1勝4和5負。

‧柏達邦連開4場角球大。

‧史特加近9場8次開入球大。

‧史特加連續3次對賽半場不失。
乜都玩錦囊：史特加火力回升博先入波

柏達邦近期防線勁曳，對上5場勁失10球，期間有4次先失守。相反史特加為咗逃出降班漩渦，已連續8場有波入，入球數字全面回升。假如大家覺得史特加贏面高，揀1.68倍第一隊入球都幾抵玩，隨時上半場已經有錢收。
德甲煞科有乜睇：柏達邦 史特加 漢堡唔贏唔掂

德甲煞科日睇咩？唔使問都知係護級大激鬥啦！柏達邦同漢堡當然係最水深火熱，就連排第13位嘅哈化柏林都有可能會賴嘢，6隊波爭上岸都咪話唔癲。當中柏達邦惡鬥史特加呢場生死戰，邊隊輸波就即刻降班；尾二嘅漢堡主場恭候史浩克04又係關鍵，漢堡唔贏來季就德乙見。
頂占筍盤：史特加（上盤）