大久保腳傷紮住上 川崎回塘吼細啱數

猪拉多纳

日職隊川崎前鋒向來畀人嘅感覺係有前冇後，典型嘅喪攻球隊，但係佢哋呢期有啲回塘，班前鋒唔係咁撻得着，今日就算主場對住往績輸蝕嘅鳥棲砂岩，恐怕都未必可以大炒一場，反而個2倍入球細仲抵博。

（有線61、201周六晚6:00直播）

川崎响等等力主場對鳥棲真係佔盡上風，過去13戰攞到10勝3負，期間仲開過6:1、6:3、7:1呢啲恐怖波膽。不過世事係會變嘅，川崎响2012、13年連續兩季主場輸畀鳥棲，上季雖則贏番鋪，但都只係2:0搞掂，已經完全大唔起對手。而且川崎嘅近況亦好曳，前排3連敗之後，雖然又3戰不敗，但只係得1勝2和，即使响日聯盃出足人，都只係打和山形1:1，狀態真係好一般。
鳥棲倒戈戰將熟晒路

由於鳥棲已經5戰不敗，佢哋件中堅谷口博之又係川崎舊人，熟晒中村憲剛、大久保嘉人啲路數，川崎好難為所欲為，何況大久保隻右腳有傷腫咗，鳥棲就算輸都唔慌大煲，入球細咁好分不妨冷敲。