薩斯索羅唔赦烏甸

猪拉多纳

歐洲各大聯賽臨近尾聲，唔知各位心目中嘅「銀行隊」有否帶挈大家搵番多少呢？今晚意甲大部分都係無關痛癢賽事，但唔代表冇好嘢，當中烏甸尼斯主場對薩斯索羅（圖），後者回勇兼有得受讓咁筍，下盤趁早入貨。

（周日晚9時開賽）

有玩開意甲嘅球迷都知道，由於各隊都注重防守，強隊讓得辣經常贏波輸盤堅難玩，好似上周中意大利盃決賽拉素對祖雲達斯，全世界都睇好小讓平半嘅「斑馬兵團」，連大戶都早早入定啲上盤，諗住瞓醒收錢。兩軍開波僅11分鐘便各入1粒，散戶見佢哋咁搶韁，梗係唔執輸「走地」入番多少大盤，點知雙方愈踢愈保守，唔單止個大盤「窩河」，祖記去到加時先至入波奠勝，贏波捧盃都唔益上盤客正一衰波，令莊家兩瓣殺晒。
潛力股止蝕回升

上述就係買意甲強隊經常會出現嘅情況，因此肥叔寧願搵啲實而不華嘅「潛力股」，例如薩斯索羅。雖然佢哋表現波動較大，亦冇另一愛隊熱拿亞主場特醒嘅優點，但呢班波打道氣，順起上嚟起碼好一排，經過5場不勝嘅悶局，薩斯索羅用一波兩連勝止蝕，包括上輪擊敗AC米蘭，贏得勁有說服力，相反近11仗贏得兩場咁大把嘅烏甸，表現失魂落魄，仲要讓半球咪玩喇？一於入番啲薩斯索羅下盤。