朗尼復出攞尾彩

猪拉多纳

紅魔打沉病虎

今晚英超煞科，焦點梗係邊隊降班啦！水深火熱嘅侯城喺主場恭候曼聯，雖然紅魔已經篤定躋身前4，穩奪來屆歐聯參賽資格，但領隊尹戈爾就講明今晚絕對唔會手軟，仲會派最強陣容出擊。加上隊長朗尼今晚傷愈復出，相信必定會帶領紅魔喺煞科戰踢出漂亮一仗，曼聯小讓平半，心水推介1.88倍上盤。
侯城頹爆3連敗

落後紐卡素2分嘅侯城，今晚要贏波兼望紐卡素失分先有望逃出生天，戰意肯定唔使懷疑。不過呢隻「病虎」近排表現曳到爆，佢哋近3場聯賽輸晒，上季由熱刺來投嘅中場積基李華摩亞，又因為對可卡因呈陽性反應被內部停賽。本身侯城戰鬥力已經弱，再少個中場悍將，真係雪上加霜！況且佢哋主場向來冇乜料到，今晚對曼聯唔想輸都難。
尹戈爾講公平派強陣

一路有傳曼聯傳奇領隊費格遜喺幕後落「柯打」，叫班手足放水畀侯城，幫吓舊部屬布魯士。不過紅魔教頭尹戈爾就講明唔會放軟手腳，否則會對紐卡素唔公平，皆因曼聯今季兩循環雙殺紐卡素，所以佢哋同樣要喺侯城身上全取6分喎！

最重要係隊長朗尼今仗傷愈復出，相信佢一定想喺今季最後一戰帶領球隊贏波，拎番個尾彩！況且曼聯今季表現大上大落，受盡外界批評，尹帥為省靚招牌抖暑，今晚實叫班球員加多幾錢肉緊，小讓平半抵捧啦！
Data King：紅魔交手最少入3球

‧曼聯對上7次鬥侯城全部贏晒。

‧紅魔連續5仗至少轟入侯城3球。

‧侯城今季英超主場18戰，錄得5勝4和9負。
乜都玩錦囊：侯城冇火玩入球細

雖然話侯城為保英超席位，今仗焗住要攻，之但係班波火力麻麻，最近連續2仗食白果之餘，今季聯賽主場18戰亦只入得19球，咁嘅火力真係想入多粒都難。至於無欲無求嘅曼聯今晚戰意成疑，既然兩邊進攻各有隱憂，不妨考慮1.95倍入球細。
盤路解碼：紅魔今季聯賽場均角球總數10.18球。