櫻花爭氣炒起熊本

猪拉多纳

如果對住包尾大幡都贏唔到，今季降落日乙嘅大阪櫻花，真係唔使再諗升班嘞，所以今日晏畫佢哋作客熊本羅亞素，冇理由開唔到個客W，小讓半一肯定博1.92倍櫻花上盤。

日乙已經過咗3分1個球季，櫻花以一個超級豪華嘅陣容踢過次級聯賽，居然暫時只係排第8位，落後榜首磐田山葉成8分咁多，爭標固然唔係易事，如果稍一不慎，入唔入到升班附加賽都好成疑問，正因為咁，櫻花今日對住包尾嘅熊本，根本唔可能再Hea住踢。
趕走Hea踢卡卡奧

查實以人腳嚟講，有科蘭、卡卡奧、山口螢、扇原貴宏、玉田圭司呢啲國腳級人物坐鎮嘅櫻花，根本夠晒料响日職生存，踢日乙本來真係easy執。但係世事無絕對，佢哋除咗季初係威係勢6戰不敗，跟手就開始跌Watt，呢期仲夠膽死主場2連敗添。呢班波係咪故意留前鬥後呢？冇人知，冇人敢肯定，唯一肯定係隊波嘅鬥心麻麻，早兩個星期櫻花宣布6月就唔同卡卡奧續約，據講就係嫌佢態度差，呢一點就可以反映問題所在。
熊本攻守都唔掂

櫻花高層飛起卡卡奧，3月底簽番嚟嘅另一件前鋒田代有三，又已經傷愈復操，一定程度上會帶番起隊波嘅戰意。而且熊本無論入球同失球，都係日乙排尾二、三嘅削嘢，後衞片山獎典仲要斷腳抖3個月，即使呢個禮拜狂谷防守術，恐怕都頂唔住櫻花嘅3箭頭強攻。