普雷斯頓吔住「豆腐」升班

猪拉多纳

今晚英甲附終極一戰，普雷斯頓同史雲頓會師溫布萊球場，爭奪最後一張英冠入場券。兩軍論人腳同近況明顯以普雷斯頓佔優，1.98倍主勝可謂不二之選。

（TVB302及廣東體育周一凌晨0:30直播）

普雷斯頓今季防守表現強韌，失球數字僅次於英甲盟主布里斯托城，上圈鬥車士打菲特兩回合亦成功保持清白身，加上箭頭碧福特同祖加拿狀態弗到漏，近5場包辦晒球隊所有入波，各自分別斬獲5粒，要撕破史雲頓條豆腐防線真係話咁易！
史雲頓紙紮防線難捱

想知道史雲頓條防線有幾豆腐？佢哋連續8仗場場有失波唔在講，英甲附4強次回合主場鬥錫菲聯，明明大好形勢贏緊3:0，最後都可以被迫和5:5完場，防守真係差到冇朋友。

最弊係隊長兼中堅尼敦湯臣拉傷腿筋今場未必踢到，冇埋呢件防線領袖壓陣，睇怕想唔輸波都幾難。