博佢半場窿對窿

猪拉多纳

米堡諾域治穩陣行先

足球聖殿溫布萊球場今晚會舉行英冠升班附加賽決賽，米杜士堡激戰諾域治，係人都知英超係隻金蛋，只要踢得上英超，一季嘅收入已經係天文數字，今晚贏波嗰隊可穩袋至少1.2億鎊（約14.4億港元）嘅升班利潤，梗係搏盡啦！不過決賽場合肯定保守，加上兩軍都好守得，上半場冇交收好正路，0比0嘅半場波膽有2.25倍，非常值博！

（TVB 301周一晚10時直播）

老牌球隊米杜士堡對上一次喺英超踢已經係08至09球季，之後多年都喺英冠一蹶不振，今季能夠復甦，最大功臣肯定係領隊卡蘭卡，佢身為「寸王」莫連奴嘅徒弟，教波功力梗係有番咁上下，絕招同樣係擺大巴陣穩守，入波少失波亦少。講真，我諗好多球迷同科娜一樣，都唔太鍾意睇呢種為求爭勝而唔理觀賞角度嘅功利足球，不過咁又點呀，佢哋又點會企喺觀眾嘅角度諗喎，「米堡」應付咁重要嘅決賽，今仗好大機會繼續踢守勢波。
兩軍領隊都有料到

諾域治今場開波前會搵嚟一位喺意外中失去父親嘅15歲男孩基蘭史密夫做球會吉祥物，希望藉此鼓勵呢位「金絲雀」死忠堅強活下去。諾域治唔單止好識氹粉絲，亦都好識睇人，上任領隊尼爾阿當喺今年初因戰績差而引咎辭職，球會高層就喺蘇超咸美頓搵嚟名不經傳嘅阿歷士尼爾執教，勢估唔到呢位33歲蘇格蘭教頭只係用咗半季時間就帶領「金絲雀」殺到嚟英冠升班附加賽決賽，真係唔嘢小，為咗唔想前功盡廢，相信阿歷士尼爾今仗會部署得極為小心，尤其比賽初段絕對唔想先落後，既然兩軍都抱相同心態，上半場戰情隨時陷入膠着，兩無紀錄返更衣室嘅機會極高。