歐霸華麗轉身 有得爭

猪拉多纳

今晚歐霸終極決戰，由衞冕嘅西維爾火併迪尼普。以前冇乜人吼歐霸盃冠軍，最主要原因係獎金少，同歐聯差天共地，消耗唔少卻得雞碎咁多，被好多球隊視為雞肋。好彩歐洲足協痛定思痛決定改制，今屆歐霸盟主可取得下屆歐聯附加賽資格，咁又唔同講法喇，畢竟都係一座錦標，亦可藉此渠道參加歐聯，名成利就邊個唔想呀，呢招大大刺激起各隊嘅爭勝鬥心，同以往想快快出局嘅心態截然不同。

迪尼普非泛泛之輩

話晒都係一場過嘅生死戰，好多變數，雖然西維爾之前曾三度奪標，名氣、實力及經驗都勝一籌，但寂寂無聞嘅烏克蘭球隊迪尼普，4強能夠淘汰拿玻里，絕非泛泛之輩，分分鐘有機會爆冷，至少喺法定時間頂住唔輸，唔排除要打加時甚至互射12碼都未定。千祈唔好諗住西維爾坐定粒六，因為世界上冇贏硬呢回事，Peter睇好受讓嘅迪尼普。
金句：迪尼普水鬼升城隍 拚死無大害我鍾意