漢堡回勇護級賽勝券在

猪拉多纳

力圖避免歷史上首次降落德乙嘅漢堡，今晚會喺護級附加賽首回合同德乙三哥卡爾斯魯厄死過。大家唔善忘嘅話，都會記得漢堡上季點樣喺附加賽死裏逃生。話晒闖蕩德甲超過半世紀，佢哋頑強嘅生命力絕對唔嘢小，加上之前為求護級經已全面反彈，漢堡主場出擊有力先拔頭籌，博1.98倍主W。

（有線61、64、201及203、廣東體育周五凌晨2:30直播）

又係漢堡，佢哋上季憑喺護級附加賽踢走格雷特霍夫先至護級成功，勢估唔到今季又要踢多次。有過上季嘅經驗，對漢堡自然更為有利，加埋荷蘭老將雲達華治踢埋呢兩場「決賽」就會約滿離隊，相信佢本人亦想好嚟好去啦！

卡爾斯魯厄進攻點少

查實漢堡護級決心好大，佢哋喺德甲煞科戰前曾經拉隊去以SPA聞名嘅小鎮馬蘭特集訓，卒之上周六贏咗史浩克後，換嚟一線生機。教練拉巴迪亞見有效，前日原班人馬又再去多次馬蘭特，重訂明班球員「練波、食飯同瞓覺」都要喺埋一齊，話咁樣係加強球員團結同決心喎！果然，漢堡最後5場聯賽攞到3勝1和1負佳績，就係狀態同決心十足嘅證明。

卡爾斯魯厄搶到德乙第3可踢附加賽，前鋒洛雲軒寧斯居功至偉，佢全季攻入17球，入波佔咗總數3成7，可以話一夫當關。弊在就係成隊波只靠佢一個搵食，漢堡要集中嘜佢，難度唔太大啫，睇嚟卡爾斯魯厄作客都難逃一敗！
頂占筍盤：漢堡（主勝）