世青盃開鑼戰撐烏克蘭U20

猪拉多纳

2015年世青盃決賽周將於周六早上開幕，今屆賽事喺新西蘭舉行，共有24隊角逐。由於上屆冠軍法國無緣決賽周，阿根廷、德國、巴西自然成為捧盃熱門。揭幕戰由A組東道主新西蘭U20迎戰烏克蘭U20，新西蘭青訓水準始終同歐洲有一大段距離，即使有地利，相信亦難有作為。烏克蘭人腳主要來自國內兩大勁旅薩克達同基輔戴拿模，質素贏晒，可望旗開得勝，捧客W。

（周六早上9時開賽）
新西蘭青訓輸在起跑線

新西蘭07年先至首次出戰世青盃，過去4屆有3屆進身決賽周，但都係分組賽出局，而且1場都未贏過。由於足球喺新西蘭並唔太受歡迎，投入青訓資源少，一班小將已經輸在起跑線，好難同歐美球隊抗衡。烏克蘭能夠喺競爭激烈嘅歐洲區脫穎而出，質素有保證，後衞班達更入選過大國腳，足以喺新西蘭身上全取3分。