硬谷半場大開波即嚟料

猪拉多纳

阿仙奴維拉決戰溫布萊

講到今晚盃賽夜，最矚目嘅梗係英格蘭足總盃決賽，由上屆盟主阿仙奴喺溫布萊硬撼阿士東維拉。兵工廠力爭衞冕冠軍戰意必堅，王牌阿歷斯山齊士(A山)講明話想捧盃先至拒投利物浦，今仗必定使出渾身解數爭士哥，撞正維拉箭頭賓迪基又着火，喺激情少帥舒活帶領下唔會做縮頭龜死守，隨時一開波就嚟料，不妨早早買定半場大睇好波。

(now 621及633周日凌晨零時30分直播)
基奧特跌Watt靠晒A山

貴為上屆足總盃盟主，加上衝擊聯賽同歐聯失敗後，阿仙奴會更加肉緊爭取衞冕，上周英超煞科日喺主場大勝西布朗4比1，為足總盃決賽前夕助威，嗰場連中三元嘅禾確特及轟入世界波嘅韋舒亞，因長期受傷已非球隊主力，不過見到佢哋咁搶韁，亦推動到阿歷斯山齊士（A山）、奧斯爾同艾朗藍斯等中前場必然正選更加搏命。

剛獲FB選為年度英超最佳球員嘅A山，賽前重申上年選擇加盟阿仙奴，而非出得起較高價錢嘅利物浦，就係覺得兵工廠更有機會奪冠。事實證明A山眼光唔差，紅軍今季四大皆空，而阿仙奴仍有力衝擊足總盃，呢位智利國腳仲話睇咗好多球隊以前喺足總盃嘅比賽片段，好嚮往贏取呢項盃賽歷史悠久嘅盃賽，仲豪言話贏足總盃只係開始，可見佢野心極大。4強苦戰英冠仔雷丁，就係憑A山梅開二度涉險過關，喺「銀河唯一」基奧特跌Watt，阿仙奴前線就要靠佢入波。
賓迪基弗爆誓闖歐霸

雖然阿士東維拉僅僅排尾4護級成功，但自從激情少帥舒活中途接手後，維拉一改前任林拔嗰種死氣沉沉嘅保守戰術，敢於同對手搶攻，此舉更激活箭頭賓迪基，呢位比利時中鋒於季尾11場獨取11粒，協助球隊上岸兼殺入足總盃決賽，包括準決賽對利物浦攻入扳平一球。

維拉上下都希望透過奪得足總盃，搶得下屆歐霸入場券。況且阿仙奴喺上屆決賽開波冇耐就先失兩球，最終打到加時先至反勝侯城封王，維拉當然會趁兵工廠陣腳未穩搶士哥。既然兵工廠火力全開，維拉又喺初段搶韁博偷雞，預計佢哋一開波就鬥攻，不如轉玩有2.5倍嘅半場大。