聖日耳門可以開定香檳

猪拉多纳

盃賽決賽之夜，場場都係決賽大戰，各位球迷今晚又係唔使瞓。幾場波之中，Peter最睇唔通巴塞會否為下周歐聯決賽留力，佢哋喺西盃嘅對手畢爾包實力唔係咁差，如果巴塞唔去盡，隨時會中招，因此呢場都係純以欣賞角度，睇好波算數嘞！不過法國足總盃、英格蘭足總盃同德國盃冠軍誰屬，筆者都有心水之選。先講法足盃，巴黎聖日耳門對住乙組仔歐塞爾，前者自失意歐聯後，於國內賽事不斷發力，先後奪得聯賽同法聯盃錦標，由法國名宿白蘭斯領導嘅「大巴黎」，其人腳喺國內超晒班，要輕取歐塞爾完成國內三冠王大業真係「依絲執」，絕對可以開定香檳！

至於另一法籍主帥雲格帶領嘅阿仙奴，儘管未能威脅車路士喺聯賽嘅領導地位，但自季中開始一輪連勝氣勢，令佢哋重拾信心，況且兵工廠乃上屆足總盃盟主，志切蟬聯冠軍有盃落袋，今晚決賽出戰實力較弱嘅阿士東維拉，要衞冕成功並非太難。
兵工廠禾堡睇高一線

最後德國盃禾夫斯堡火併多蒙特，「蜜蜂兵團」可謂樹倒猢猻散，主帥高普帶埋今仗便離隊，究竟現在隊波士氣如何？好多人話佢哋會博盡捧盃歡送高普，但Peter就唔係咁睇！禾堡今季用蔗渣價錢踢出燒鵝味道，攻守兼備唔係好蝦，聯賽位列亞軍有辦你睇，相信佢哋贏面會較高。不妨用聖日耳門、阿仙奴同禾夫斯堡整番條熱熱哋嘅冠軍3串1過關，另外記往係買冠軍而唔係齋W，乘埋有2.7倍咪嫌少呀！
金句：兩個法國領隊 兩個盃賽冠軍