ＰＳＧ火速大起歐塞爾

猪拉多纳

法足盃今晚於巴黎法國球場上演決賽，法乙歐塞爾越級挑戰力爭成為三冠王嘅班霸巴黎聖日耳門（PSG）。歐塞爾今季於法乙表現唔突出，而且晉級路途所受考驗唔大，對住有半個主場之利嘅PSG大有螳臂擋車之感，不過讓球主客和PSG讓二球太辣，建議改捧大盤或半場大。

（TVB 301周日凌晨3時直播）

以往有唔少乙組甚至更低組別球隊入過法足盃決賽，不過通常冇咩好結果，翻查紀錄，過去九次有法甲以外球隊參與嘅決賽，只有08/09球季由當時仍在法乙嘅甘岡可以成功捧盃，其餘八支低組別隊伍都未能以弱勝強。今屆來自法乙嘅歐塞爾喺晉級過程中踢咗七場比賽，除咗八強及四強贏過法乙比斯特和法甲甘岡，其餘五圈對手唔係丙組就係業餘隊伍，而且佢哋今季聯賽長期位列中游，表現一般，欠缺爆冷本錢。
伊巴復操可以候命

PSG今季已經贏得法甲同法聯盃兩項錦標，今場贏埋就可成為法甲史上首支三冠王。王牌射手伊巴謙莫域因傷缺席最後兩輪聯賽，但喺周中已經復操，預計可以候命。就算伊巴唔出得，前線仲有另一可靠前鋒卡雲尼，呢名烏拉圭射手喺對上六場聯賽個人入九球，狀態托弗，對住低一層次嘅防線唔愁冇波入。

唔計歐聯賽事，PSG喺國內賽事已豪取十一連勝，加埋入咗三十九球，進攻火力驚人，但考慮到佢哋近期防線有唔少甩漏，對住蘭斯、蒙彼利埃、梅斯等下游球隊都有失波，讓球主客和讓二球略嫌太多，建議改捧大盤。如果嫌1.45倍大盤冇肉食，可捧2.1倍半場大，事關上述十一連勝走勢入面，近十場上半場至少都有兩個入波出現，開「半大」機會高達九成，值得再追。