浦和攻擊點廣圍剿鳥棲

猪拉多纳

只要唔輸，浦和紅鑽今日就可以造出13戰不敗，平咗日職紀錄，但係呢班波攻擊點分布廣，尋常球隊根本頂佢哋唔住，浦和今日作客鳥棲砂岩，當然唔可能求和，一於博浦和1.72倍客勝啦！

（開賽時間：周六晚6:00）

浦和家陣12戰不敗累積30分帶頭，比踢多一場嘅「老二」廣島三箭多4分，只要剩低5場波攞多12分，就可以贏得首階段冠軍，喺呢啲關鍵時刻，浦和又點會咁唔長進求和先？事實上浦和攻擊力強、得分點廣，例如中場關根貴大、前鋒武藤雄樹就各入4球，省咗3粒嘅有興梠慎三、隆比真歷呢對箭頭同中場梅崎司，總共有5件射得之人，真係唔知嘜邊個好。

相反鳥棲雖然往績佔優，2000年起主場6戰浦和，取得4勝1和1負，幾乎可以話有壓倒性優勢，不過佢哋有個明顯弱點，就係集中靠豐田陽平單槍匹馬搵食，全隊今季暫時所入18球，豐田一條友就佔咗10球，換言之只要凍結咗佢，鳥棲即刻會變冇牙老虎。

當然，鳥棲係支好敢起用新人嘅球隊，好多時候落場11人嘅平均年齡得25歲，細過唔少日職勁旅，所以鳥棲嘅活力非常強，浦和要贏都要嘥唔少氣力，更加冇乜保證可以唔失波，所以1.98倍入球大亦可諗吓。