拿玻里派W送別肥賓

猪拉多纳

搶歐聯波飛生死戰

意甲今晚煞科，賓尼迪斯做主角！「肥賓」告別戰率領拿玻里主場對拉素，成為佢意甲今季最重要一戰，事關拿玻里必須全取3分，先至可以參加下屆歐聯。呢位西班牙籍名帥臨別秋波，勢必使出渾身解數，力求後來居上，留下美好回憶，眾將士肯定識做搏老命。拉素季尾連場硬仗踢到殘，頂唔住來勢洶洶嘅拿玻里，簡單要主W。

（TVB301周一凌晨2時45分直播）

賓尼迪斯日前已宣布離隊，99%加盟皇馬，佢執教拿玻里兩年，最遺憾莫過於歐聯戰線，連番遭滑鐵盧，上屆分組賽獲12分，卻因對賽成績較差出局，今屆更喺附加賽被淘汰，成為呢位「盃賽專家」心中一條大刺。今場聯賽屬於爭下屆歐聯入場券生死戰，成為「肥賓」彌補遺憾嘅最後機會，唔可以再失拖，否則孭住「失敗者」污名，轉投皇馬，冇晒威信，將來日子肯定難捱。賓尼迪斯一定落「必勝令」，全力搶3分。

拿玻里勝在多進攻猛將，希古恩、荷西卡利祖、加比亞甸尼、咸錫、梅斯頓都有上乘入球能力。球隊今季聯賽主場成績，僅次於冠軍祖雲達斯，賓尼迪斯只要肯擺大個頭主攻，勝算仍然樂觀。
拉素傷疲作客冇運行

由於意甲同分，先計算對賽成績，拉素現時領先拿玻里3分，但因首循環0比1不敵對手，所以如果今場再輸，就只能將季軍之位拱手讓人。拉素季尾表現走晒樣，近8場僅兩勝，上仗仲喺打吡戰不敵羅馬，否則依家就唔使咁頭痕。呢支首都球隊近期賽程好惡啃，先係意盃決賽同祖記激戰120分鐘輸波，跟住輸畀羅馬，遭遇兩場重大失利，身心都大受打擊，今仗又要作客拿玻里，隨時吃不消，再輸埋都唔奇。
前鋒成肚火 撐國米半場大

同晚另一場直播波，國際米蘭主場對安玻里。「藍黑軍團」射手莫路伊卡迪今季表現出色，累積20個聯賽入球，未計昨晚維羅納對祖雲達斯賽果，喺射手榜僅落後「一哥」東尼1球，以20球與祖記泰維斯並列第2位，咁啱莫路伊卡迪落選美洲盃嘅阿根廷大軍名單，谷埋成肚火肯定搵安玻里祭旗，大盤熱爆至1.48倍，可考慮揀2.15倍半場大。

（TVB302周一凌晨2時45分直播）