W飛數唔尋常 卡利亞里尼料 熱拿亞有薩冇賠

猪拉多纳

意甲 02:45（日）34 薩斯索羅 Vs 熱拿亞

今日意甲煞科，可以話係近年最平靜嘅一季，原因係聯賽冠軍一早已經明花有主，三個降班席位亦早已塵埃落定，唯一懸念係歐聯資格成為拉素及拿玻里之爭，餘下多為例行公事。是日推介卡利亞里主勝及熱拿亞客勝，兩隊近日飛數都有不尋常異動，意甲季尾特別多蠱惑波，唔好唔信邪呀！

意甲默契波係當地足球文化嘅一部分，雖然經過多次打擊之後，已經冇以往咁猖獗，但臨近季尾始終要睇飛做人，好似薩斯索羅對熱拿亞場波，足智彩個客W出奇地熱，睇番全世界客W都係做緊2.4至2.5倍，但馬會卻低至2.15倍，差距咁大確係較為罕有。

睇番熱拿亞近期確實係Sharp醒，近9仗贏咗7場，而且近3場更攻入12球之多，正式係入波當食生菜。前鋒柏禾列迪、耶高法爾基腳風順到不得了，由於薩斯索羅近期踢法都相當進取，所以今場除咗熱拿亞客W之外，入球大都係唔錯嘅選擇。

另一場卡利亞里對烏甸尼斯，已經降班嘅主隊今季表現令人失望，但煞科戰對護級成功嘅烏甸尼斯，主W嘅外地賠率竟然不斷急跌，平均由2.36倍跌至2.26倍，而一向睇意大利波極準嘅馬會，卡利亞里主勝更熱至2.08倍，情況並不尋常。
烏甸陣容不整Hea踢

睇番烏甸尼斯護級成功後，近期表現相當Hea，上仗主場輸畀薩斯索羅，可以用慘不忍睹嚟形容，今場更有古靴美托里斯同彭拿基奧迪斯干尼停賽，陣容不整，卡利亞里今場應該可以攞番個尾彩，以一場勝仗答謝球迷支持！

（TVB301台周一凌晨0:00直播）

樂比推介：熱拿亞（客勝）、卡利亞里（主勝）