科蘭卡卡奧掛住跳船 櫻花北伐札幌捱「細」界

猪拉多纳

如果睇波只係為睇球星嘅話，今日場日乙獨腳戲札幌岡薩多對大阪櫻花，應該係追星族嘅Target，但係從菠菜角度而言，打波好講心態，球星唔係戰意保證，呢場波博1.65倍入球細，好過要海鮮波櫻花個2.08倍客W。

（開賽時間：周一晚6:00）

如果講大家耳熟能詳嘅球星，札幌就有稻本潤一、小野伸二兩件前日本國腳；櫻花就仲勁，除咗烏拉圭一代射手科蘭之外，玉田圭司、山口螢、茂庭照幸、扇原貴宏都係現役或者前「藍武士」分子，雙方落場嘅22人，有近10個係國腳級，夠晒星味。
札幌小野上陣成疑

可惜吖，呢兩隊波今季嘅戰績同投入根本唔成正比，當中最令人失望嘅，唔使講梗係陣容超豪華嘅櫻花。佢哋除咗開季頭6六場不敗係威係勢，跟住時贏時輸，完全冇路捉，依家得22分排第8位，落後榜首大宮松鼠9分，比起今日嘅對手札幌都少4分，如果再唔振作，追榜首固然冇行，入升班附加賽都唔係實得。

因為咁樣，櫻花按理應該開始發力，但係佢哋呢排對住長崎、熊本都開唔到W，歸根究柢就係班人戰意散渙，好似卡卡奧就提前响上個月確認唔續約，科蘭七月亦會轉去土耳其搵食，個個都只顧自己，隊波有乜法子唔死。

雖然係咁，日本球迷網上預測賽果，居然係97%睇好櫻花「北伐」反彈贏波，其實咁都唔出奇，首先札幌件小野伸二未知會唔會復出，其次係佢哋今季嘅主勝率只得四成；櫻花今季8場客戰雖然只輸1場，但就開咗4場和波，點睇都似五五波，咁嘅情況買口入球細算嘞。